Tratra ny tanjona tsy nitrangan’ny loza, araka ny tatitry ny APMF (Agence portuaire maritime et fluviale) nanomboka ny 30 jona hatramin’ny 15 jolay tany Sainte Marie. Tao anatin’io fotoana io ny « Festival des baleines », nahitana fitomboan’ny sambo mpitatitra mampitohy an’i Soanierana Ivongo - Sainte Marie na Mahambo - Sainte Marie. Samy nandray andraikitra nifanandrify azy nisorohana izany loza izany ny APMF avy aty amin’ny foibe Antananarivo sy ny avy ao Toamasina. Natao ny fanentanana sy  ny  fihaonana  tamin’ireo  tompon’andraikitra  isan-tokony  ho fampahafantarana ny fepetra. Nantsoina tamin’izany ireo tompon-tsambo  sy  mpitondra, ny zandary sy tafika an-dranomasina. Tao koa ireo  avy  amin’ny  minisiteran’ny Fitaterana sy ny fizahantany, hatramin’ny distrika sy kaominina. Mpiara-miombon’antoka amin’ny APMF daholo ireo.

Nisy ny  fanaraha-maso  teny amin’ny  seranana, miainga avy any Soanierana Ivongo na Mahambo sy any Sainte Marie (Port  Barachois,  Port  de  l’Ilot Madame, Lokintsy). Narahina akaiky ny toetr’andro. Niezaka ny rehetra nanaraka ny toromarika sy ireo lalàna mifehy ny fifamoivoizana an-dranomasina mba hieren-doza. Hamafisina hatrany ny fanarahan-dalàna momba ny fitaterana an-dranomasina sy an-dranomamy. Jerena ireo taratasin-tsambo, indrindra ny “permis de navigation”, manaporofo fa vita “visite technique de sécurité”, sy ny fananany fiantohana.

Hampanjary ny fitaterana amin’ny fotoana rehetra

Olona nahazo fiofanana tsara ireo natao hitondra sambo. Raha sanatria misy ny loza, nefa nisy ny tsy fanarahan-dalàna, voasazy ny mpitondra sy ny tompon-tsambo fa miala maina koa ireo izay niharan-doza. Nandritra io fotoana io, nampiofana mpanamory sambo madinika (skippers), miisa 40 ny APMF sy nanome salotr’aina  (gilets  de sauvetage) 100 tao Soanierana Ivongo ary 100 tao Sainte Marie. Isaorana, noho  izany,  ireo rehetra  nifanome  tanana. Tanjona ny hampanjary ny fitaterana an-dranomasina sy an-dranomamy mandritra ny fotoana rehetra fa tsy natao ho an’ny “Festival des baleines” ihany.  

Légende : Ireo sambo mpitatitra ao Sainte Marie.

R.Mathieu